Raila Odinga, musharraxii looga adkaaday xilka Guddoomiyaha Midowga Afrika, ayaa warbaahinta kula hadlay magaalada Addis Ababa, isagoo shaaca ka qaaday inuu dib ugu laabanayo dalkiisa Kenya si uu u sii wato shaqadiisa.

Hadalkan ayaa dhaliyay su’aalo badan, maadaama Raila Odinga lagu yaqaanay inuu si weyn uga soo horjeedo Madaxweyne William Ruto, oo isaguna dadaal badan geliyay sidii uu xilkan ugu guuleysan lahaa, balse ku guuldareystay.

Raila Odinga oo diiwaanka Ra’iisul Wasaaraha Kenya ku galay xilli buuq badan ka jiray Dowladdii Madaxweynihii 3aad ee Kenya, Mwai Kibaki, ayaa markale qorsheynaya inuu cadaadis siyaasadeed saaro Hoggaamiyaha haatan xafiiska jooga, William Ruto.

“Qorshaheygu waa in aan dalkeyga dib ugu laabto si aan wax badan u qabto,” ayuu yiri Raila Odinga, Ra’iisul Wasaarihii hore ee Kenya, balse wuu ka gaabsaday inuu faahfaahin dheeraad ah ka bixiyo qorshayaashiisa mustaqbalka.

Dhanka kale, xildhibaanno iyo siyaasiyiin taageersan Raila Odinga ayaa soo jeediyay in Xukuumadda William Ruto ay jarto qaaraanka ay siiso Midowga Afrika, kaddib guuldarradii adag ee Raila Odinga kala kulmay musharraxii ka socday Jamhuuriyadda Jabuuti, kaasoo ku guuleystay kursiga Guddoomiyaha Midowga Afrika.

Waxaa la filayaa in Raila Odinga uu si weyn ugu soo laabto saaxadda siyaasadda Kenya, taasoo laga yaabo inay sii adkeyso xiriirka kala dhexeeya dowladda William Ruto.