Maxkamadda Darajada Koowaad ee Ciidamada Qalabka Sida ayaa maanta dhageysatay eedaha loo heysto Tahliil Axmed Fiidow Caraale, oo horay uga tirsanaa Ciidamada Xoogga Dalka balse la sheegay inuu markii dambe ku biiray kooxda ‘AS’.

Tahliil ayaa maxkamadda ka hor sheegay in kooxda ‘AS’ ay gacanta ka jartay, kaddib markii lagu soo eedeeyay xatooyo (tuuganimo). Maxkamadda ayaa loo horgeeyay eed ah inuu qarax ka geystay degmada Kaaraan ee gobolka Banaadir.

Wuxuu sheegay in qaraxa dhacay bishii Oktoobar 2024 uu ka qaaday xaafadda Towfiiq ee degmada Yaaqshiid, isaga oo geeyay degmada Kaaraan.

Xafiiska Xeer Ilaalinta Maxkamadda Ciidamada Qalabka Sida ayaa codsaday in xukun adag lagu rido Tahliil Axmed Fiidow, oo sidoo kale loo yaqaanno Cali Daahir Jimcaale, maadaama qaraxa lagu eedeeyay uu sababay dhimasho dad rayid ah.

Dhanka kale, eedeysanaha iyo qareennadiisa ayaa si wadajir ah u codsaday in loo fududeeyo ciqaabta, maadaama uu qirtay qayb kamid ah dambiyada loo heysto.

Ugu dambeyn, Guddoomiyaha Maxkamadda, Gaashaanle Sare Xasan Cali Nuur (Shuute), ayaa fadhiga soo xiray, waxaana la filayaa in go’aan laga gaaro xukunkiisa.