Ciidanka Xoogga Dalka Soomaaliyeed (CXDS) iyo ciidamada deegaanka ayaa howlgal qorsheysan ka fuliyay magaalada Bacaadwayne ee Koonfurta gobolka Mudug, halkaas oo ay ku sugnaayeen kooxaha Khawaarijta oo dhibaatooyin ba’an ku hayay shacabka deegaanka.

Saraakiisha hoggaaminaysay howlgalka ayaa xaqiijiyay in weerarka si toos ah loogu beegsaday fariisimihii Khawaarijtu ay ku baadaysay dadka shacabka ah, iyagoo muddo dheer halkaasi uga hanjabayay bulshada. Ciidamada huwanta ayaa cagta mariyay saldhigyada argagixisada, halkaas oo ay ku sugnaayeen horjoogayaal iyo maleeshiyaad muddo dhuumaaleysi ku joogay deegaanka.

Howlgalkan ayaa qeyb ka ah dadaallada ay Ciidanka Xoogga Dalka iyo kuwa deegaanka wadaan si loo cirib tiro kooxaha Khawaarijta ee ku dhuumaaleysanaya gobollada dalka, loogana xoreeyo shacabka Soomaaliyeed culeyska ay saareen.

Wararkii ugu dambeeyay ee laga helayo howlgalka ayaa muujinaya in khasaaro xooggan lagu gaarsiiyay argagixisada, iyadoo ciidamadu ay la wareegeen fariisimihii ay ku sugnaayeen Khawaarijtu. Faahfaahinta rasmiga ah ee qasaaraha la gaarsiiyay cadowga ayaa la filayaa in dhowaan la shaaciyo.

Dowladda Soomaaliya iyo shacabka deegaanka ayaa si wadajir ah ugu hanjabay in dagaalka ka dhanka ah kooxaha argagixisada uu sii socon doono, isla markaana aysan jirin meel ay ku dhuumaalan karaan. Ciidanka Xoogga Dalka ayaa horay u ballan qaaday in gobollada dhexe laga ciribtiri doono Khawaarijta, si shacabka loogu xaqiijiyo nabad iyo xasillooni.