Buulo-Mareer, Shabeelaha Hoose – Maxamed Ciise Cismaan Cosoble, oo kooxda Khawaarijta loogu yiqiinay magaca afgarashada ah “Seefulaah,” ayaa si iskiis ah isku soo dhiibay Ciidanka Xoogga Dalka Soomaaliyeed, gaar ahaan Ururka 26-aad ee Guutada 6-aad, Qaybta 60-aad CXDS ee ku sugan magaalada Buulo-Mareer.

Cosoble ayaa ka tirsanaa kooxda Khawaarijta Al-Shabaab, isaga oo ka howlgalayey deegaano ka tirsan Koonfur-galbeed Soomaaliya. Wuxuu sheegay inuu ka baxay fikirkii xagjirnimada kadib markii uu indhihiisa ku arkay dhibaatada ba’an ee kooxdaasi ku hayaan shacabka Soomaaliyeed iyo burburka ay u horseedeen deegaanka.

Maxamed Ciise Cosoble ayaa hadda gacanta ugu jira Ciidanka Xoogga Dalka Soomaaliyeed, si waafaqsan habraacyada amniga, waxaana la marsiin doonaa baaritaan iyo barnaamij dib-u-dhaqan celin ah, si loo hubiyo xaaladdiisa amni iyo in dib loogu biiriyo bulshada si masuuliyad leh.

Ciidanka Xoogga Dalka Soomaaliyeed ayaa sii wada howlgallada lagu wiiqayo awoodda Khawaarijta, iyadoo la dhiirrigelinayo xubnaha doonaya inay ka baxaan kooxdaasi isla markaana ay isu soo dhiibaan dowladdu.