Muqdisho – Wasiirka Difaaca Xukuumadda Federaalka Soomaaliya, Mudane Axmed Macallin Fiqi, ayaa maanta magaalada Muqdisho kulan miro-dhal ah kula yeeshay Agaasimaha Guud ee Wasaaradda Arrimaha Gudaha ee Turkiga, Safiirka Turkiga ee Soomaaliya, Mudane Alper Aktaş, iyo saraakiil sare oo ka tirsan ciidamada qalabka sida ee Turkiga.

Kulanka ayaa diiradda lagu saaray xoojinta iskaashiga laba geesoodka ah, gaar ahaan dhinacyada amniga, difaaca, iyo la-dagaallanka kooxda Al-Shabaab. Wasiir Fiqi ayaa tilmaamay in xiriirka Soomaaliya iyo Turkiga uu yahay mid ku dhisan walaaltinimo, ixtiraam iyo dan-wadaag, isla markaana uu sii xoogeysanayo sanadba sanadka ka dambeeya.

“Turkigu waxa uu door muuqda ka qaatay taageerada dhanka amniga iyo dib u dhiska hay’adaha dowladeed ee Soomaaliya. Waa saaxiib muhiim ah,” ayuu yiri Wasiir Fiqi.

Dhankiisa, Safiir Alper Aktaş iyo wafdigiisa ayaa xaqiijiyay in Turkigu uu sii wadi doono garab istaagga shacabka iyo dowladda Soomaaliyeed. Waxa ay carabka ku dhufteen sida ay uga go’an tahay in ay gacan ka geystaan la dagaallanka argagixisada, taageerada ciidamada, iyo horumarinta xiriirka istaraatiijiga ah ee labada dal.

Kulankan ayaa qeyb ka ah dadaallada joogtada ah ee lagu xoojinayo iskaashiga Soomaaliya iyo Turkiga, gaar ahaan dhinacyada amniga iyo difaaca.