Dowladda Turkiga waxaa lagu yaqaannaa siyaasad ku dhisan dan gaar ah, taasoo mar walba u janjeerta halkii ay danaha qarankeeda ugu badan yihiin. Saaxiibtinimadeedu ma aha mid sal adag oo la isku halleyn karo, mana aha mid ku dhisan garab istaag joogto ah ama mabda’ sugan. Halkii dantu ugu jirto ayay taagan tahay, xitaa haddii ay taasi dhaawac ku tahay cid kale.

Marka la eego mowqifyada Turkiga ee arrimo badan oo la xiriira Soomaaliya, waxaa laga dareemi karaa in aanu Turkigu ahayn saaxiib dhab ah. Marar badan wuxuu isu muujiyey inuu yahay “nin cadowgaaga fiirsanaya”, balse aan si dhab ah kuu garab taagneyn marka aad u baahan tahay taageero muuqata ama mid dhab ah.

Si kastaba ha ahaatee, waa muhiim in la xuso in Turkigu si dhab ah u garab istaagay dowlado ay ka mid yihiin Azerbaijan, Libya, Sudan, iyo Itoobiya — taasoo muujinaysa in marka uu dano muhiim ah ka leeyahay dal gaar ah, uu si xooggan u muujiyo taageeradiisa.

Su’aasha meesha taal ayaa ah: Soomaaliya dan ma uga muuqataa Turkiga sida ay uga muuqdaan dalalkaas kale? Mise xiriirkooda wuxuu ku kooban yahay dano ku meel gaar ah iyo saamayn siyaasadeed oo la xiriirta istiraatiijiyadda gobolka?

Qoraa: Abdisalan Firidho