Wasiirka Arrimaha Dibadda iyo Iskaashiga Caalamiga ah ee Xukuumadda Federaalka Soomaaliya, Axmed Macallin Fiqi, ayaa sheegay in Madaxweynaha Dowlad-Goboleedka Puntland, Siciid Cabdullaahi Deni, uu diiday kaalmada Dowladda Federaalka ee lagu xoojinayo dagaalka ka dhanka ah Daacish.

Axmed Macallin Fiqi ayaa tilmaamay in qorshaha Dowladda Federaalka uu yahay in la taageero dagaalka ka dhanka ah Daacish iyada oo la siinayo hub, adeegyo caafimaad, iyo saanad ciidan si guulo wadajir ah loo gaaro. Si kastaba ha ahaatee, Siciid Deni ayaa kasoo horjeestay taageeradan.

Wasiir Fiqi wuxuu intaas ku daray in Dowladda Federaalka ay dedaal badan ku bixisay sidii ay u qancin lahayd Madaxweynaha Puntland, balse Siciid Cabdullaahi Deni uu xiray albaab kasta oo ay Dowladda uga soo gudi lahayd arrintan, maadaama aysan awood u lahayn inay si xoog ah u farageliso.

Dowlad-Goboleedka Puntland ayaa marar badan ku eedeysay Dowladda Federaalka Soomaaliya in ay ku daawanayso dagaalka ka socda dhulka buuraleyda Calmiskaad ee Gobolka Bari, taas oo ay sheegeen inay fursad u tahay kooxda Daacish inay sii xoogeysato.