Munaasabadda Maalinta Aas-aaska Ciidanka Asluubta Soomaaliyeed ayaa maanta lagu qabtay magaalada Dhuusamareeb, halkaas oo ciidamada ay soo bandhigeen dhoolatus. Munaasabadda waxaa ka qeybgalay Wasiirka Wasaaradda Caddaaladda iyo Arrimaha Garsoorka Galmudug, Wasiirka Wasaaradda Awqaafta iyo Arrimaha Diinta Galmudug, Wasiir Ku-xigeenka Wasaaradda Kalluumeysiga Galmudug, Guddoomiyaha Maxkamadda Gobolka Galgaduud, iyo Guddoomiyaha Caasimadda Dhuusamareeb.

Xuseen Axmed Carab, oo ah Hoggaanka Saadka, ayaa ka warbixiyey taariikhda aas-aaska Ciidanka Asluubta iyo shaqooyinka ay qabtaan.

Guddoomiyaha magaalada Dhuusamareeb, Macallin Cabdiraxmaan Cali Maxamed (Geedqorow), oo munaasabadda ka hadlay, ayaa ballan qaaday dhulka laga dhisi doono xabsiga, wuxuuna bogaadiyey shaqada ay Ciidanka Asluubtu u hayaan bulshada.

Guddoomiyaha Maxkamadda Gobolka Galgaduud, Cismaan Cali Hudeey, ayaa sheegay in Ciidanka Asluubtu si wanaagsan ula shaqeeyaan maxkamadaha, wuxuuna xusay in saraakiishooda hoggaaminaysa ay mudan yihiin in la dalacsiiyo.

Sidoo kale, Wasiirka Wasaaradda Caddaaladda iyo Arrimaha Garsoorka Galmudug, Cabdullaahi Axmed Maxamed, ayaa bogaadiyey adeegga ay Ciidanka Asluubtu u hayaan bulshada, isagoo uga mahadceliyey sida ay uga madax bannaan yihiin waxyaabaha aan wanaagsanayn.

Maalinta maanta oo kale, sanadkii 1970-kii, ayaa la aas-aasay Ciidanka Asluubta Soomaaliyeed, waxaana sanad guuradii 55-aad si weyn looga xusay Galmudug, gaar ahaan Dhuusamareeb. Ciidanka Asluubta ee Galmudug ayaa dadaal badan soo galay, iyagoo qabta shaqooyin dheeraad ah oo muhiim u ah bulshada.