Muqdisho – Wasiirka Amniga Gudaha ee Xukuumadda Federaalka Soomaaliya, Mudane Cabdullaahi Sheekh Ismaaciil (Fartaag), ayaa maanta guddoomiyay shir muhiim ah oo diiradda lagu saaray dardargelinta howlaha Hey’adda Socdaalka iyo Jinsiyadda Soomaaliya.

Shirka oo ka dhacay magaalada Muqdisho ayaa waxaa ka qeyb galay Agaasimaha Guud ee Hey’adda Socdaalka iyo Jinsiyadda, Mudane Mustaf Sheekh Cali Dhuxulow, iyo agaasimeyaasha hey’adda ee ka kala socda dowlad goboleedyada dalka.

Intii uu socday shirka, mas’uuliyiintu waxay Wasiirka uga warbixiyeen howlaha muhiimka ah ee ay hey’addu u hayso bulshada Soomaaliyeed, iyadoo la isla gartay in la xoojiyo adeegyada socdaalka iyo jinsiyadda gaar ahaan gobollada dalka.

Waxaa sidoo kale shirka lagu falanqeeyay sidii loo mideyn lahaa nidaamyada shaqo ee heer federaal iyo heer dowlad goboleed, loona horumarin lahaa adeegyada si loo daboolo baahiyaha muwaadiniinta Soomaaliyeed.

Mas’uuliyiintu waxay isla lafa gureen caqabadaha jira, fursadaha horumarineed, iyo tallaabooyinka lagu tayeyn karo adeegyada socdaalka iyo jinsiyadda.

Ugu dambeyn, Wasiir Fartaag ayaa ku dhiirrigeliyay madaxda hey’adda in ay xoojiyaan wada-shaqeynta iyo is-afgaradka u dhexeeya hay’adaha heer federaal iyo kuwa dowlad goboleed, si shacabka loogu adeego si hufan oo amni lagu dheehay.