Roobabkii daadadka watay ee saacadihii la soo dhaafay ka da’ay magaalada Muqdisho ayaa sababay khasaare isugu jira dhimasho, dhaawac iyo burbur hantiyeed. Xaafado badan oo ka tirsan caasimadda ayaa la sheegay in ay saameeyeen fatahaado iyo biyo fadhisyo sababay in dad badani barakacaan.

Dhibaatada roobabka oo mar walba soo noqnoqda xilliyada gu’ga iyo deyrta ayaa dhalisay baaqyo ku aaddan in dib loo eego qaab-dhismeedka magaalada, gaar ahaan nidaamka biyo mareenkeeda.

Ra’iisul Wasaare ku-xigeenka labaad ee dalka, Jibriil Cabdirashiid, ahna guddoomiyaha guddiga uu Ra’iisul Wasaare Xamse Cabdi Barre u magacaabay maareynta saameynta roobka, ayaa sheegay in Muqdisho uu qaab-dhismeedkeedu is beddelay, taasoo sababtay in biyaha aanay helin meel ay maraan.

“Waxaa yaraaday Meelihii biyaha laqi lahayd, sababtoo ah laamiyada iyo waddooyinka yaryar ee interlock-ga ah ayaa ku batey magaalada,” ayuu yiri Jibriil Cabdirashiid.

Dhanka kale, Duqa Muqdisho, Maxamed Axmed Amiir, ayaa hore u sheegay in dib u habeynta magaalada iyo nadaafaddu ay ka mid yihiin ajandeyaasha ugu muhiimsan ee maamulka gobolka Banaadir.

Si kastaba ha ahaatee, weli waxaa muuqata in caqabado waaweyn ay ka jiraan qorsheynta magaalada iyo u diyaargarowga roobabka, iyadoo loo baahan yahay in si degdeg ah wax looga qabto dhibaatooyinka soo noqnoqda.