Muqdisho, Soomaaliya – 15-ka May 2025: Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta ubax dhigay Taallada Ururka SYL ee ku taalla magaalada Muqdisho, isagoo si rasmi ah uga qeybgalay xuska maalinta dhallinyarada Soomaaliyeed oo ku beegan 15-ka May.

Xuskan ayaa lagu maamuusayaa halgankii gobannimo-doonka ee ay hormuudka ka ahaayeen 13-kii dhallinyaro Soomaaliyeed ee aasaasay ururkii SYL (Somali Youth League), kuwaasoo horseed u noqday xornimada iyo jiritaanka qaranimada Soomaaliya.

Hambalyo iyo Dhiirrigelin Madaxweyne Xasan Sheekh Madaxweynaha ayaa shacabka Soomaaliyeed iyo gaar ahaan dhallinyarada ugu hambalyeeyay munaasabaddan qaran, isaga oo ku bogaadiyay kaalinta muhiimka ah ee ay dhallinyaradu maanta ku leeyihiin:

“Dhallinyaradu waa laf-dhabarta dalka. Waxa ay door muuqda ka qaadanayaan horumarinta qaranka iyo dagaalka lagula jiro kooxaha Khawaarijta ee raba in ay burburiyaan midnimadeenna,” ayuu yiri Madaxweynaha.

Xuska Halgameyaashii SYL iyo Duco Shacbiyeed Intii uu ku sugnaa Taallada SYL, Madaxweyne Xasan Sheekh ayaa si gaar ah xus iyo duco ugu sameeyay 13-kii halgame ee aasaasay ururka, kuwaasoo doorkooda geesinimo ee taariikhda dalka ku reebay raad waara. Madaxweyne Xasan ayaa tilmaamay in mabaa’diida SYL ay weli yihiin kuwa hagaya hannaanka dowlad-dhisidda iyo midnimada shacabka Soomaaliyeed.

“SYL waxay noogu tageen dhaxal taariikhi ah – midnimo, wadaninimo, iyo halgan. Waxaan ku boorrinayaa shacabka Soomaaliyeed in ay ilaashadaan qiyamkaas qiimaha leh,” ayuu yiri Madaxweynaha.

Baaq Ku Wajahan Dhallinyarada iyo Shacabka Soomaaliyeed Madaxweynaha ayaa fariin culus u diray dhallinyarada Soomaaliyeed, isagoo xasuusiyay in mas’uuliyadda dalkooda ay gacantooda ku jirto, loona baahan yahay in ay kaalin weyn ka qaataan dhismaha nabadda, dhaqaalaha, iyo horumarka guud ee dalka.

Xuska 15-ka May: Maalin Taariikhi ah oo Lagu Xasuusto Geesiyaashii Dhallinyarada Soomaaliyeed 15-ka May waa maalinta ay shacabka Soomaaliyeed u asteeyeen xuska ururkii gobannimo-doonka SYL, taasoo hadda ka badan 80 sano ka hor ay dhallinyaro Soomaaliyeed ku mideeyeen himilo qaranimo iyo xorriyad. Munaasabaddan ayaa sanad kasta laga xusaa guud ahaan dalka iyo qurbojoogta Soomaaliyeed ee dibadda ku sugan.