Bağdaad, Ciraaq – May 16, 2025 – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta u safray magaalada Bağdaad ee caasimadda dalka Ciraaq, halkaas oo uu kaga qeyb galayo Shirka Waddamada Carabta oo si rasmi ah loo furayo maalinta berri ah.

Shirkan oo ah mid heer sare ah ayaa diiradda lagu saarayaa xoojinta iskaashiga Carabta ee dhinaca amniga, iyadoo si gaar ah loogu falanqeynayo dagaalka lagula jiro kooxaha xagjirka ah sida Daacish iyo Al-Shabaab.

Sidoo kale, ajandaha kulanka waxaa ka mid ah arrimaha Falastiin, gaar ahaan xaaladda bani’aadantinimo ee ka taagan marinka Qasa, iyadoo madaxda Carbeed ay ka doodi doonaan sidii wax looga qaban lahaa baahiyaha nololeed ee shacabka reer Falastiin.

Kulanka ayaa lagu wadaa in uu kusoo dhammaado war-murtiyeed rasmi ah, kaasoo ay madaxdu ku soo bandhigi doonaan qodobbada ay ku heshiiyeen iyo tallaabooyinka wadajirka ah ee la qaadi doono.

Shirkan ayaa lagu wadaa in uu xoojin doono doorka wada-shaqeynta Carabta ee dhinacyada amniga, siyaasadda iyo taageerada shacabka ku tabaaloobay colaadaha ka jira gobolka.