Ciidanka Xoogga Dalka Soomaaliyeed ayaa howlgallo culus ka wada deegaanada ku teedsan Jiinka Wabiga Shabeelle ee Gobolka Shabeellaha Dhexe, si loo cirib tiro kooxaha Khawaarijta ah ee halkaas ku dhuumaaleysanaya.

Howlgalladan oo si weyn loo dardargeliyay ayaa lagu guuleystay in laga saaro Argagixisada dhowr deegaan oo muhiim ah, kuwaas oo kala ah Kiliga Maxamed Diirshe, Raas Qaboobe, Jameeco, Shanloow, Dhagaxoow, Yaaqle, Damileey iyo deegaano kale oo ku yaalla Jiinka Wabiga Shabeelle.

Saraakiisha Ciidanka Xoogga Dalka ayaa warbaahinta Qaranka u sheegay in howlgalka ay si wadajir ah uga qeyb qaadanayaan ciidamada deegaanka, iyagoo xusay in jab xooggan lagu gaarsiiyay cadowga. Ciidanku waxay sheegeen in tiro badan oo ka mid ah maleeshiyaadka la dilay, halka kuwo kale gacanta lagu dhigay.

Howlgalladan ayaa qeyb ka ah dadaallada dowladda Soomaaliya ee lagu xasilinayo deegaannada ay Argagixisadu horay ugu sugnaayeen, si loo xaqiijiyo amniga iyo nolol caadi ah oo ay bulshada deegaanka ku noolaato.